चीनले दियो भूकम्पपीडितलाई ४० करोडको राहत सामग्री

पोखरा, २२ कार्तिक/जाजरकोट र पश्चिम रुकुमका भूकम्पपीडितका लागि चीन सरकारले पठाएको राहत सामग्री हस्तान्तरण भएको छ। बुधबार दिउँसो चिनियाँ राजदूत छन सोङले पोखरा अन्तर्राष्ट्रिय विमानस्थलमा राहत सामग्री उपप्रधान तथा गृहमन्त्री नारायणकाजी श्रेष्ठलाई हस्तान्तरण गरेका हु्न्।

चिनियाँ जनमुक्ति सेनाको जहाजबाट २८ करोड मूल्य बराबरको राहत सामग्री र केरुङ नाकाहुँदै १० करोड बराबरको राहत सामग्री नेपाल आएको हो।

चिनियाँ दुई कार्गो विमानमार्फत् उक्त सामग्री पोखरा ल्याइएको हो। गृहमन्त्रालयका प्रवक्ता नारायणप्रसाद भट्टराईले ४६ सय ब्ल्यांकेट र ६ सय थान पाल चिनियाँ सहयोगस्वरुप पोखरा आएको र बुधबार हस्तान्तरण भएको जानकारी दिए । 

यसअघि पहिलो खेप सहयोग केरुङ नाकामार्फत् आइसकेको उनले बताए । केरुङ नाका हुँदै चिनियाँ सरकारले २३ ट्रक छुट्टै राहत सामाग्री पठाएको हो। जसमा दुई हजार तीन सय टेण्ट, दुई हजार ब्लाङ्केट, सात सय टर्पलिन, पाँच सय वटा महामारी रोक्ने स्पेयर र साँढे १० हजार वटा लामखुट्टे मार्ने औषधि छन्।  ती सामग्री  जाजरकोट र रुकुम पश्चिम लैजाने सरकारको तयारी छ।  

राहत सामग्री बुझेपछि उपप्रधानमन्त्री श्रेष्ठले चिनियाँ सरकारप्रति कृतज्ञता व्यक्त गरेका थिए। नेपाल र चीन ऐतिहासिक मित्र देश भएको र दुबै मुलुक एकअर्काको दु:खमा साथमा रहेको उपप्रधानमन्त्री श्रेष्ठले बताए।

त्यसक्रममा राजदुत सङले पश्चिम नेपालको भुकम्पका कारण भएको मानवीय र भौतिक क्षतिप्रति गहिरो  दु:ख व्यक्त गर्दै मृतकहरूमा श्रद्धाञ्जली र पीडामा परेका जनतामा  समवेदना व्यक्त गरेका थिए। नेपाल र नेपाली जनताको दु:खमा आफ्नो देशको सधैं साथ सहयोग रहने र राष्ट्रपति सि जिन पिङले समेत पत्र पठाएर त्यो संवेदना जाहेर गरेको उनले बताए ।

नेपालगञ्ज जानुपर्ने जहाज पोखरा आएको किन ? भन्ने सञ्चारकर्मीको जिज्ञासामा उपप्रधानमन्त्री श्रेष्ठले रुट र सहजका हिसाबले विमान पोखरा अवतरण भएको बताए। उनले भने,’पहिला पनि चिनबाट पोखरा उडान भरेको रुट र सहजताका हिसाबले विमान राहत सामग्री लिएर पोखरा आएको हो। यसमा राजनीतिक वा अन्य कारण केही छैन।’

राहत लिएर नेपालगंज जानुपर्ने जहाज  पोखरा अन्तर्राष्ट्रिय विमानस्थलमा अवतरण भएपछि कतिपयले आश्चर्य व्यक्त गरेका छन्।  पोखरा अन्तर्राष्ट्रिय विमानस्थल चिनियाँ लगानीमा निर्माण भएको हो। अख्तियार दुरुपयोग अनुसन्धान आयोगले पोखरा विमानस्थल निर्माणका क्रममा अरबौं रुपैयाँ अनियमिता भएको आंशकामा छानबिन सुरू गरेको छ।

LEAVE A REPLY

Please enter your comment!
Please enter your name here